ليلة "جرد" السنة

**الليلة الوقفة، وبكرة العيد وبعده ليلة رأس السنة 2007 **
المرة دي ولأول مرة هاكتب بالعامية، واعتذرلك يا فصحى يا جميلة الليلة دي معلش
بمناسبة الليلة دي، عمري ما حبّيت أسمّيها ليلة "رأس" السنة، وبختارلها دايما مسمّى عجيب شوية وهو ليلة "جرد" السنة
لأني بحـِـسّ إننا بنظلمها لمّا نربطها بسنة جاية مجهولة مالهاش علاقة بيها لسّة، والأوْلى نربطها بسنة فاتت، كانت مليانة ضحك ودموع وعجايب
عادة بقعد الليلة دي في البلكونة، لوحدي، بعد ما أتأكّد ان العيلة كلها نامت، عشان يبقى الأتموسفير مناسب و"وحدوي" (إيه يا بنت الكلكعة دي؟ واضح ان الفصحى كانت أرحم
المهم، في قعدتي دي بيكون معايا جواب من نوع خاص، ما بحبّش أفتحه إلا الساعة 11:30 بالليل، وأقعد أقرا فيه النص ساعة اللي فاضلة من السنة المرحومة
بقرأه مرة واتنين وتلاتة، وأقعد أفكّر في اللي مكتوب فيه، وطبعا لازم أردّ عليه، عشان ما يصحّش أطنّش المرسل، وفي العادة بيكون الردّ عبارة عن وعود والتزامات وحـِلفانات، وشوية خطط وتكتيكات صغيرة كدة
أكيد دلوقتي اتعرف مين المرسل!..... ده الأستاذ رئيس قسم الأرشيف في الديوان العام لتسجيل وتوثيق الذكريات والأحداث ، تقسيم 2006 (ايه اللقب الطويل الغلس ده! إختصارا هسمّيه عمّو أشرف بتاع الأرشيف)
الجواب المرّة دي مش طويل قوي، مليان حاجات بتشوّك، بس برضه فيه شوية ورد وبلالين ومراجيح--- بس معلش يا عمّو هاضطر أفتحه بدري السنة دي عشان انت عارف زنقة الخروف والدبح والعيد والكلام دة كله
فتحت جواب عمّو أشرف ولقيته موضّبه بطريقة منظمّة أحسن بكتير من شخبطة السنة اللي فاتت، وايتديت أقرا:
هاي دودو إزّيك (عمو أشرف روش شوية)
ها؟ إيه رايك في السنة اللي عدّت دي؟ طويلة؟ قصيرة؟ خفيفة؟ تقيلة؟ حلوة وهاتعلّم معاكي؟ ولاّ "تنذكر ما تنعاد" على رأي اخوانّا الشوام؟
أنا عارف إنّك ما بتطيقيش السؤال ده وعايزاني أخشّ في المفيد... يللا يا ستّي خدي عندك، بس عايزك تبقي متأنية في الرد كدة وتكتبيلي حاجة جديدة وصادقة فعلا... أسيبك دلوقتي مع قائمة الجرد السنوي... (بالمناسبة، إيه رأيك في التنظيم المرة دي؟) :
أولا: الانجازات:
1- تقدّم ملحوظ في شغلك الثانوي، اتعلّمتي حاجات جديدة، عرفتي إزّاي تتعاملي مع نوعيات غريبة من الناس وتقدري برضه تاخدي منهم شغل كويس بالطريقة اللي انت عايزاها
2- سعيتي بمجهود عشان البعثة، وانشاء الله بعد العيد ربنا هيكرمك، بس صبرك بالله على موظفين الحكومة، هتتنقطي منهم، بس معلش، كاس وبتدور علينا كلّنا
3- عملتي المدوّنة بتاعتك، ورغم قلة الزوار والمعلّقين، بس فيها بوستات حلوة فعلا، ما تبطّليش
4- رجعتي تقرأي بشراهة تاني، بعد فترة مش قصيّرة من "التيبّس" العقلي
5- رجعتي ترسمي تاني برضة بعد فترة من "التجبّس" الفني

ثانيا: الاحباطات:
1- لمّا باباكي رفض سفرك انت وصاحبتك لتركيا، بعد ما خذلوكو 5 أصحاب تانيين كان مفروض كلكم تسافروا سوا في جروب
2- لمّا مشرف الرسالة عصلج وما عدّاش المقترح البحثي بتاعك من السيمينار، خلّيكي وراه وما تستسلميش
3- سفر واحدة من أعزّ صديقاتك مع جوزها لأمريكا لمدة 4 سنين
4- سفر صديقة عزيزة تانية برضه هي وجوزها لأمريكا، بعد ما ابتديتو تقرّبو لبعض وتفهموا بعض قوي --أاااه منك يا أمريكا يا مفرّقة الناس

ثالثا: أحلى لحظة: لمّا اكتشفتي إنك أخيرا قابلتي توأم روحك اللي يكمّلك
رابعا: أسوأ لحظة: لمّا اكتشفتي إنه لسّة ما قابلش اللي تكمّله
خامسا: أشخاص وأشياء وأحداث جديدة: توأم الروح المذكور سابقا، زميلتين عمل جداد: واحدة بتحبيها أوي، وواحدة مشيت قبل ما تكرهيها، معلّمتك وحبيبتك سحر الموجي، رحلة الغردقة، مشاركتك في النشاط الثقافي في الشغل (لازم ترجعي تلتزمي معاهم تاني وبلاش دلع)، مشاركتك الصغيرة في بداية مشروع مؤسسة أهلية لمكافحة المخدرات، حفلة اسكندريلا في الساقية، عملتي كوكيز بالشوكولاتة عجبت كل الناس وطلبوها منك تاني، افتتاح البوك شوب "الكتب خانة" واللي شايفة إنه هيكبر ويبقى في شهرة مكتبة الديوان، قصيدة الكعكة الحجرية لأمل دنقل

سادسا: لحظة بكى فيها قلبك: لمّا كانوا بيصوّروا في الأخبار أنقاض مبنى في الضاحية الجنوبية لبيروت، وكان في جثة أم حاضنة طفلها، ولمّا حاول رجل الانقاذ يفتح ايدين الأم ويشيل جثة الطفل، كانت ايديها قافلة عليه بحنان غريب---حتى بعد ما فارقت الروح جسدك يا أم
سابعا: إكتشافات ذاتية عن الذات نفسها: إكتشفتي إنك محتاجة تقعدي مع نفسك أكتر، تسدّي الباب عن الدوشة برّة، تـُجـْردي مشاعرك، أفعالك، وردود أفعالك بشكل يومي أو حتى أسبوعي، وما تستنّيش عمك أشرف من السنة للسنة، وتحاولي تقاومي ضعفك وتحوّشي لحظة الحب والشغف الحقيقية للشخص الصح، وإن احساس الشفقة على النفس ده فخ لازم تخرّجي نفسك منه بسرعة، وتحاولي ما تقعيش فيه تاني.... جلد الذات شئ مهم، بس الأهم هو احتضانها بعد كل سقطة بحنان وتفهّم

انتهى الجواب، وابتدت ماكينات المخ تشتغل، تهضم المكتوب، وتطحن في الأفكار، تجترّ الذكريات، وتضرب على وتر الضمير... كل دة وأنا قاعدة لا أحرّك ساكنا ولا أنبس ببنت شفة (مش قلنا الفصحى أحسن من العكّ اللغوي ده

ما حسّيتش بنفسي إلا ودمعة سخنة بتعدّي ببطء على خدّي، نشفت بسرعة عشان الجو برد، بس كان في دموع شجن لسّة محبوسة

طب ليه الدموع أصلا؟؟ دة سؤال نفسي عميق صعب أجاوب عليه، فيه لحظات كدة بتستدعي دمعة من غير سبب محدّد، من حقّك تدمّع، تعيّط، تفنهق حتى، بس تمسح كل اللي نزل من عينينك، وتقوم أقوى، وأحسن، عشان لسة في بكرة ولسة في 2007 عايزين يتكتبلنا فيها تقرير كويس

مرسي يا عمّو أشرف، بس تصدّق ما ليش نفس أكتب أردّ عليك، ارجوك ما تاخدهاش بشكل شخصي، أنا فعلا فهمت كل اللي كتبته، استوعبته، وحطّيته في مكان أمين جوة القلب والعقل
ما اقدرش أوعدك إن كله هيبقى تمام وفل الفل السنة الجاية، بس أكيد هشتغل على مناطق الضعف، هعلّق عليها يافطة منطقة عمل" ، واروح على مناطق القوّة أعمّرها، وأزرع فيها وأملاها ورد وشجر ومراجيح
و يا رب 2007 تكون مختلفة بشكل إيجابي....
يا ترى شايلالنا إيه يا سنة يا جديدة ....؟

ملحوظة: كان للصوت الحزين الصادر من الخروف المكبّل أسفل العمارة، دور استثنائي في خلق خلفية مأمأة موسيقية نادرة ساعدتني كثيرا في كتابة هذه التدوينة، معلش يا بو فروة صوف دافية، مش هتلحق 2007